|
A l'Ammiragliō Giōvanni Bettolō
Pè ûn muggiō dè mōtivi e specialmente
Perchè anche vûi sei cōmme i Camuggìn
Nato e cresciû in mâ e finalmente
Perchè sei de Camuggi çittadin,
Sentō ûn besognō forte e prepōtente
Dè dedicave i versi me meschìn.
Cōscì se ûn giorno vè satesse in mente,
Quande anche vûi lascieï de fa ō marin,
Dè vegnivene in mezō a ‘e nostre gente,
Doppō tantō travaggiō, a riposâ,
Vè truviescï dō paize za aō cōrrente.
Perchè, vedeï, cōn questō librettìn
In ‘të ûn mōmentō vûi puœi imparâ
A cōnōscê Camōggi e i Camōggìn.
Giacomo Razeto
Primo Macchinista – P.fo Duca di Genova
***
L'avvegnî de Camōggi
Nata in sce ûn ïsoettinn-a dirupâ
Camōggi, che dō resto a gh'ëa vixinn-a,
Pe’ pœìse estendê, co'ûnn-a passerínn-a,
Ä costa ûn bello giōrno a s'è attaccâ.
Primma a s'è esteiza tûtta in riva a-o mâ,
Ma doppo a l'ha dovûo montâ in collinn-a,
Formando fra e sò stradde ûn mōntechinn-a
Ch'ō rende fadigóso ō passeggiâ.
Però se s'asc-cianesse ō Castellâ,
Nō sōlo se formieìva ûnn-a cianûa
Dä Ciassa dō Teatro finn-a in mâ,
Ma de in tō Castagnôu spariâ ä dreitûa
L'ûmido che ghe porta a gran rōsâ,
Chè ō sô ō se gh'affermiâ pe’ fin ch'ō dûa.
Ma ancōn de ciù, da questa gran cianûa,
Che, pe-o sò clima dôçe, a diventiâ
Ûn scito allegro de villezzatûa,
Da-o quæ tûtta a Rivëa se dominiâ,
E a vista se godiâ de tûtta Rûa,
Scavâ in trincea, dä parte verso ō mâ,
Partiâ ûnn-a stradda, còmoda e segûa,
Che finn-a San Fertōso a l'arriviâ.
E co-i detriti che bêuttian zù in mâ,
E quarche lebecciadda ûn pö inçernûâ,
A ciazza in poco tempo a se ingrandiâ.
Coscì Camōggi a diventiâ ä dreitûa
Ûn Eden, segge a stæ che pe’ svernâ,
Ûn vëro Paradiso in miniatûa!
***
Ō Mûseo Marinaro de Camōggi
A-o Raxōnê Gio. Bono Ferrari, Fondatô dō Mûseo (1938)
Dunque Camōggi anchêu ō se pêu vantâ
D'aveì lê ascì ûn magnifico Mûseo,
Ch'ō prêuva che s'è dïto sempre ō vëo
Vantando a sò Marinn-a ammalemmâ.
A quæ a l'è sempre stæta equipaggiâ
Da ûn personale ardimentoso e fëo,
Che ûn Camòggin, da sōlo, ō fava ō'rëo
De duï foresti, sensa esagerâ.
Descrìvive ō Mûseo? Ma ō dî pe rïe,
Che a vœìlo fâ, nō me bastieìva ûn giōrnol
Ve’ baste dî che e mûage sōn gremïe
De quaddri de velieri e tûtt'intōrno
Modelli gh'è de barchi, gh'è istrumentì,
E de Marinn-a ûn mûggio de ingredíenti!
De questi, a dïve ō vëo, ghe n'è mai tanti,
Che manco ve-i savieìvo nominâ;
Gh'è di astrólabï antighi e gh'è sestanti
Di ciù moderni che se pêu attrovâ.
Gh'è bûsciœ d'ogni tipo, gh'è quadranti,
Gh'è carte e gh'è scandaggi pe’ sōndâ,
Gh'è cannōcciali... ma se vaddo avanti,
Ve _tëgno chì daveì pe’ ûnn-a giórnâ.
E quande ve l'avesse ben descrîto,
Dovieìsci sempre andâlo a vixitâ;
Perché questo Mûséo, ve 1'hò za dïto,
Ciù d'ogni cosa ō vêu documentâ,
Che a-o mōndo nō existeìva ûnn-a Marinn-a
Ch'a sûperesse quella Camōgginn-a!
***
A Casa de Riposo de Camōggi pe’ i veterani dō mâ
Primma che a Casa a föse costruïa,
Pochi credeìvan ch'a se poeìse fâ,
E quande doppo tanto a l'è finïa,
Nō gh'ëa dinæ pe’ fâla funzionâ.
E allōa ve lascio dî se l'han scöxïa!
Ma quande all'Istitûto a l'è passâ
E in poco tempo de mainæ a s'è impïa
Se sōn dovûi ricredde... e l'han lödâ.
Che lì, cōmme ûnn-a nave a çerca ō porto,
Vëgi che s'èan frûstæ in sce l’ægua sâ,
Gh'entràvan pe’ çercâ ûn pó de conforto.
Pe’ questo se dovemmo ricordâ,
Sebben da tanto tempo ō segge morto,
Dō grande camōggin che l'ha ideâ!
E za che se trovemmo in argomento
Dæto che anchêu ciù d'ûn se va a vantâ
D'aveìla da lê sōlo fabbricâ,
Ghe domandiô: Da chi e con che intervento
Avemmo avûo i -dinæ pe’ fala fâ?
E chi in Conseggio ha avûo tanto ardimento
Da ìmponn-e e fâ vötâ ō trasferimento
All'Istituto ch'ō se l'è accollâ?
E chi a fæto levâ quello mûagion
Davanti a-e scae, ch'ō riciamava ä mente
L'entrata antiga de ûn munio bastion?
E chi ha fæto acquistâ recentemente
A Villa che co-a Casa a-confinava?
Ve seì scordæ, n'è vëo? Me l'aspetäva!.=
|
